بہزاد لکھنویؒ کی مشہور نعتیں

ﷺﷺﷺ۔ ﷺﷺﷺ۔ ﷺﷺﷺ ﷺﷺﷺ۔ ﷺﷺﷺ۔  

حضرت بہزاد لکھنوی(1974-1895) کی غزلیں اور نعتیں انہیں اُردو ادب میں ایک منفرد مقام عطا کرتی ہیں۔ان کی شاعری میں جذبات و احساسات بھرپور پائے جاتے ہیں۔ آپ کو اُردو دنیا میں عاشق رسول ؐ سے یاد کیا جاتا ہے۔

بہزاد لکھنویؒ کی مشہور نعتیں

مدینے کو جائیں، یہ جی چاہتا ہے

مقدّر بنائیں، یہ جی چاہتا ہے

مدینے کے آقا ؐ، دوعالم کے مولاؐ

تیرے پاس آئیں، یہ جی چاہتا ہے

جہاں دونوں عالم ہیں محوِ تمنّا

وہاں سَر جُھکائیں، یہ جی چاہتا ہے

محمدؐ کی باتیں، محمدؐ کی سیرت

سُنیں اور سُنائیں، یہ جی چاہتا ہے

دِلوں سے جو نکلیں دیارِ نبیؐ میں

سُنیں وہ صدائیں، یہ جی چاہتا ہے

پہنچ جائیں بہزاد ؔجب ہم مدینے

خود کو نہ پائیں، یہ جی چاہتا ہے

٭٭٭٭٭

ﷺﷺﷺ۔ ﷺﷺﷺ۔ ﷺﷺﷺ ﷺﷺﷺ۔ ﷺﷺﷺ۔  

ہم مدینے سے اللہ کیوں آگئے

قلبِ حیراں کی تسکیں وہیں رہ گئی

دل وہیں رہ گیا، جاں وہیں رہ گئی

خم اُسی در پہ اپنی جبیں رہ گئی

اللہ اللہ وہاں کا درود و سلام

اللہ اللہ وہاں کا سجود و قیام

اللہ اللہ وہاں کا وہ کیفِ دوام

وہ صلوٰۃِ سکوں آفریں رہ گئی

جس جگہ سجدہ ریزی کی لذّت ملی

جس جگہ ہر قدم اُن کی رحمت ملی

جس جگہ نور رہتا ہے شام و سحر

وہ فلک رہ گیا، وہ زمیں رہ گئی

پڑھ کے نصر من اللہ فتح قریب

جب ہوئے ہم رواں سُوئے کُوئے حبیبؐ

برکتیں رحمتیں ساتھ چلنے لگیں

بے بسی زندگی کی یہیں رہ گئی

یاد آتے ہیں ہم کو وہ شام و سحر

وہ سکونِ دِل و جاں ،وہ رُوح و نظر

یہ اُنہی کا کرم ہے ،اُنہی کی عطا

ایک کیفیتِ دل نشیں رہ گئی​

زندگانی وہیں کاش ہوتی بسر

کاش بہزادؔ آتے نہ ہم لوٹ کر

اور پوری ہوئی ہر تمنّا مگر

یہ تمنائے قلبِ حزیں رہ گئی

*******************

ﷺﷺﷺ۔ ﷺﷺﷺ۔ ﷺﷺﷺ ﷺﷺﷺ۔ ﷺﷺﷺ۔  

دل و جاں آپ پہ قربان مدینے والے

آپ نے بخشا ہے ایمان مدینے والے

آپ نے ہم کو بتائی رہ خوشنودی حق

آپ کا ہم پہ ہے احسان مدینے والے

آپ گر چاہیں تو ہوجائے زیارت ہم کو

ورنہ کوئی نہیں امکان مدینے والے

آپ پر کیوں نہ پڑھیں دل سے درود اور سلام

آپ ہیں حاصلِ ایمان مدینے والے

آپ پر کیوں نہ فدا ہو دل و جان عالم

آپ ہیں صاحبِ قرآن مدینے والے

اب تو بہزاد کو بلوائیے جلدی یثرب

رحم اے سرور ذیشان مدینے والے۔

*******************

ﷺﷺﷺ۔ ﷺﷺﷺ۔ ﷺﷺﷺ ﷺﷺﷺ۔ ﷺﷺﷺ۔